ጠቐምቲ ሰነዳት IRCC ንስደተኛታት

መስርሕ ምሕታት ስደተኛታት ዝተሓላለኸን ብዙሕ ቅጥዕታትን ሰነዳትን ዘጠቓልል እዩ። እዚ ጸጋ እዚ ነቶም ዝተፈላለዩ ሰነዳት ዝገልጽ እዩ።

ኣስተውዕል፡ ብሰንኪ ለውጢ ፖሊሲ IRCC፡ ሰራሕተኛታትና ንዓማዊል ወኪሎም ናይ IRCC ወረቐት ክውድኡ ኣይፍቀደሎምን እዩ። ይኹን እምበር ኣብቲ መስርሕ ንምድጋፍ ብኣካል መምርሕን ምኽርን ክንህበኩም ንኽእል ኢና።

መብዛሕትኡ መስርሕ ኢሚግሬሽን ኣብ ካናዳ ብኢንተርነት እዩ ዝፍጸም። ንዝያዳ ሓበሬታ ኣብ IRCC ተወከሱ።

ምውሳን ብቕዓት

ኣብ መወዳእታ ናይቲ ብቑዕነት ቃለ መሕትትካ፡ ጠለብ ከተቕርብ ብቑዕ ኮይንካ እንተተባሂልካ፡ ‘ምውሳን ብቕዓት’ ዝብል ሰነድ ይመጸካ። ኣብ ካናዳ ናይ “ስደተኛ ጠለብ” ሕጋዊ ደረጃ ከም ዘለካ እዩ ዘርኢ።

እቲ ናይ ብቑዕነት ቃለ መሕትት ናብ መስርሕ ጠለብ ስደተኛታት ክትኣቱ ብቑዕ ምዃንካ ንምፍላጥ ጥራይ እዩ ስለዚ መመልከቲኻ ናብ ቦርድ ኢሚግሬሽንን ስደተኛታትን (IRB) ንመስማዕ ስደተኛታት ክለኣኽ ይኽእል። እዚ ናይ ስደተኛ ምስማዕካ ኣይኮነን ኣወንታዊ ውጽኢት ድማ ከም ስደተኛ ተቐባልነት ኣለካ ማለት ኣይኮነን።

እቲ ግዝያዊ ሽፋን ጥዕና ፌደራል (IFH) ምስቲ ‘ምውሳን ብቕዓት’ ዝብል ሰነድካ ተኻቲቱ ኣሎ። እዚ ናብ ሓኪም ወይ ሆስፒታል ክትከይድ ከለኻ ሕክምናዊ ሽፋን ከምዘለካ ዘርኢ ሰነድ እዩ።

ኣገዳሲ – እቲ እትረኽቦ ሰነድ ብቕዓት መን ምዃንካን ናይ ኢሚግሬሽን ኩነታትካን ዘርኢ እዩ። እቲ መስርሕ ክሳብ ዝካየድ ኣብ ካናዳ ክትጸንሕ የኽእለካ። እዚ ሰነድ እዚ ኣይትስእኑ።

ምልክታ ናይ ምምንዛዕ

እዚ ካብ IRCC ዝመጸ ናይ መፍለጢ ደብዳበ ኮይኑ፡ ዝኾነ ካባኻ ዝተወስደ ሰነዳት ከም ናብ ካናዳ ዘምጻእካዮ ወረቐት መንነት ዝዝርዝር እዩ። ኣብ መስርሕ ጠለብ ነዞም ሰነዳት ክትመልሶም ኣይትኽእልን ኢኻ። ቅድሚ ናይ መንነት ሰነዳትካ ምምላሱ፡ ጠለብካ ክሳብ ዝውሰን ክትጽበ ኣለካ። ጠለብካ ተቐባልነት እንተረኺቡ፡ ቀዋሚ መንበሪ ክትሓትት ትኽእል ኢኻ፡ ቀዋሚ ነባሪ ምስ ኮንካ ድማ እቶም ሰነዳት ክምለሱልካ እዮም።

መሰረት ጠለብ (BOC)

እዚ ንኹሉ ውልቃዊ ሓበሬታኻ እተቕርበሉን ስለምንታይ ጠለብ ከተቕርብ ከምዘለካ እትገልጸሉን ቁልፊ ሰነድ ናይ ጠለብካ እዩ። ብዛዕባ ምኽንያታትካ ንጹር ክትከውን ኣለካ፣ እንተላይ ዝኾነ ኣገዳሲ ሓበሬታን ንጉዳይካ ዘረጋግጽ ሰነዳትን። ነቲ ቅጥዒ ብሓደ ካብ ወግዓዊ ቋንቋታት ካናዳ፡ እንግሊዝኛ ወይ ፈረንሳ ክትመልእዎ ኣለኩም።

ኣብቲ ቅጥዒ ዘለዉ ሕቶታት፤

• ስለምንታይ ኣብ ዓድኻ ሓለዋ ክትረክብ ዘይከኣልካን እንታይ ዓይነት ስደት ኣጋጢሙካ (ብዓሌት፤ ሃይማኖት፤ ብሄርነት፤ ፖለቲካዊ ርእይቶ ወይ ኣባልነት ኣብ ሓደ ፍሉይ ጉጅለ) ካብ መን፤
• እቲ ስደት ኣብ ልዕሊኻ ብውልቂ እምበር ኣብ ልዕሊ ኩሉ ኣብ ሃገር ዘሎ ሰብ ከምዘይኮነ። ሕጊ ምጥሓስካ እውን ውፅኢት ኣይኮነን፤
• ናብ ካልእ ክፋል ሃገር ክትሰጋገር እንተፈቲንካን እንታይ ከም ዘጋጠመን፤
• ካብ ሃገርካ ክትወጽእ እንተደናጒኻን ስለምንታይን፤
• ኣብ ካናዳ ምስ በጻሕካ ኣብ ምሕታት እንተደናጒኻን ስለምንታይን።

ነቲ BOC ብሓገዝ ናይ ኢሚግሬሽን ጠበቓ ክትመልኦ ይምከር ይኹን እምበር ንስኻ ኢኻ እቲ ናይ ምቕራብ ሓላፍነት ዘለካ ሰብ።

ኩሉ ግዜ ቅዳሕ ናይ BOC ናትካ ምሓዝ ኣረጋግጽ።

ኣገዳሲ – እቲ BOCን እቲ እተቕርቦ መርትዖን እቶም ኣገደስቲ ሰነዳት ናይ ስደተኛ ጠለብካ እዮም። ኣብ BOC ክትፈርም ከለኻ ኩሉ እቲ እትህቦ ሓበሬታ ምሉእን ቅኑዕን ሓቅን ምዃኑ ተረጋግጽ ኣለኻ ማለት እዩ።

ናይ ስራሕ ፍቓድ

ናይ ካናዳ ናይ ስራሕ ፍቓድ መመልከቲኻ ኣብቲ ቀንዲ ሕቶ ዑቕባ ምስ IRCC ተኻቲቱ ኣሎ።

ንዝያዳ ሓበሬታ ኣብ መርበብ ሓበሬታ IRCC ተወከሱ ።

ንኽቐርብ ምልክታ

ምኽንያታት ጠለብካ እትገልጸሉ ዕለትን ሰዓትን ናይ ስደተኛ ጠለብ መስርሕካ ይሕብረካ።

ቅድመ ኩነት ዘለዎ ናይ ምብጋስ ትእዛዝ

እዚ ካብ ካናዳ ንምውጻእ ዝወሃብ 'ስታንድ-ባይ' ትእዛዝ እዩ (ምስ ፓኬጅ ሰነዳት IRCC ተሓዊሱ)። ጥርዓንካ እንተተነጺጉ ወይ እንተተገዲፉ፡ እዚ ትእዛዝ ይንቀሳቐስ እሞ ኣብ ውሽጢ ዝቕጽሉ 30 መዓልታት ብወለንታኻ ካብ ካናዳ ክትወጽእ ኣለካ።

ትእዛዝ ምስጓግ

እዚ ድማ ንኹሉ መስርሕ ስደተኛታት ዝዛዘመ፡ ኣሉታዊ ውሳነ ዝነበሮ፡ ብፍቓዱ ዘይወጸ ሰብ ዝወሃብ እዩ። ክትስጎግ ኢኻ ማለት ናብ ካናዳ ክትምለስ ኣይትኽእልን ኢኻ።